चंद्रपूर/गडचांदूर:
केंद्र सरकारच्या प्रस्तावित चार कामगार संहितांच्या (Labour Codes) निषेधार्थ आज पुकारण्यात आलेल्या देशव्यापी संपात चंद्रपूर जिल्ह्यातील सिमेंट पट्ट्यातील कामगारांनी आक्रमक पवित्रा घेतला. राष्ट्रीय मजदूर काँग्रेस (INTUC) आणि विविध कामगार संघटनांच्या नेतृत्वाखाली अंबुजा सिमेंट, माणिकगड सिमेंट आणि अल्ट्राटेक सिमेंट कंपन्यांमधील शेकडो कंत्राटी व कायमस्वरूपी कामगारांनी एकत्र येत या कायद्यांना कडाडून विरोध दर्शवला.
नेमका विरोध कशासाठी?
आंदोलक कामगारांच्या मते, केंद्र सरकारने आणलेले नवीन ४ कामगार कायदे हे भांडवलधार्जिणे असून, यामुळे कामगारांचे अनेक वर्षांचे हक्क हिरावले जाणार आहेत. आंदोलकांनी खालील प्रमुख मागण्या मांडल्या:
नवीन कामगार संहिता रद्द करा: कामगारांच्या कल्याणापेक्षा कंपन्यांच्या फायद्याला प्राधान्य देणारे कायदे मागे घ्यावेत.
कंत्राटीकरण थांबवा: कायमस्वरूपी कामाच्या ठिकाणी कंत्राटी पद्धत बंद करून कामगारांना सुरक्षितता द्यावी.
समान काम, समान वेतन: कंत्राटी कामगारांनाही कायम कर्मचाऱ्यांप्रमाणे सोयी-सुविधा मिळाव्यात.
आंदोलनाचे स्वरूप
आज सकाळपासूनच कंपन्यांच्या मुख्य प्रवेशद्वारासमोर कामगारांनी निदर्शने केली. हातात फलक आणि घोषणाबाजी करत कामगारांनी सरकारच्या ‘कामगार विरोधी’ धोरणांचा निषेध केला. “कामगार कायदे रद्द करा”, “कामगार एकजुटीचा विजय असो” अशा घोषणांनी औद्योगिक परिसर दणाणून गेला होता. विशेष म्हणजे, या संपाचा सिमेंट उत्पादनावर आणि वाहतुकीवर मोठा परिणाम झाल्याचे दिसून आले.
“हे कायदे कामगारांना गुलामगिरीकडे ढकलणारे आहेत. जोपर्यंत सरकार हे काळे कायदे मागे घेत नाही, तोपर्यंत आमचा लढा असाच सुरू राहील,” असे संबोधन विजय क्रांति कामगार संघाचे जिल्हाध्यक्ष कामगार नेते विजय ठाकरे महासचिव बबन आत्राम , सुनील ढवस , दसरत राउत इत्यादिनी यावेळी बोलताना सांगितले.
या आंदोलनामुळे कायदा सु व्यवस्था बिघडू नये म्हणून गड़चांदुर पोलीस स्टेशन चे कर्त्तव्यदक्ष ठानेदार शिवजी कदम ह्यांनी सर्व प्रमुख कामगार नेत्यांना नोटिस बजावून प्रशासनास सहकार्य करण्याबाबत विनंती केली . विविध कामगार संघटनांचे प्रतिनिधी आणि स्थानिक कामगार मोठ्या संख्येने या संपात सहभागी झाले होते. जिल्हाधिकारी महोदयास स्ट्राइक नोटिस देताना सुधीर विद्यते , अभय जवाड़े , हनुमान कुचनकर सलीम शेख व अन्य यूनियन पदाधिकारी उपस्थित होते .
